Grovbrød med surdeig

Då eg planla 52 veker med surdeig skreiv eg ned meir enn 52 oppskrifter på kva eg kunne legge ut. I tillegg spurte eg følgarane mine på Instagram om kva dei ville eg skulle legge ut av oppskrifter. Ei svarte grovbrød.

Og sidan kvardagen er tilbake og matpakkar skal smørast - blei det eit halvgrovt matpakkevennleg brød i veke 2 av 52 veker med surdeig.

Grovbrød med surdeig (2 store brød i brødform)

1000 gram vatn
200 gram bakeklar og boblande surdeigsstartar
200 gram lettkokte havregryn
200 gram sammalt kveite, grovmalt
200 gram sammalt kveite, finmalt
600 gram sikta kveitemjøl
30 gram salt

Mat surdeigsstartaren så den er boblande og klar til å bake med i god tid før du skal bake.

Bland vatn, surdeigsstartar, havregryn og mjøl for hand eller med kjøkkenmaskin. 
La deigen stå tildekka under eit klede i 30 minutt før du tilsett salt i deiga ved å klemme saltet inn. Vent nye 30 minutt før du strekker og bretter deigen. Dette gjer du kvar halvtime i 2-3 timar (4-6 gonger) før du deler deigen i to og brettar den før du har den over i to smurte eller bakepapirkledde brødformer. 
Sett kaldt for å heve i 12-48 timar alt etter kva som passar din timeplan.

Steiking; Dersom du har metallformer kan du skru omnen på 250 grader og la den bli varm før du snittar brøda på midten (som på bilete) og sett dei i omnen rett frå kjøleskapet. La dei stå i 10-15 minutt før du skrur ned varmen og steiker vidare på 200 grader i 50-45 minutt. Avkjøl heilt på rist før du skjærer i brøda. Om du har brødform i glass eller keramikk må du ikkje sette dei rett frå kjøleskapet og inn i ovnen, anbefalar då at du lar brøda stå på benken slik at formene blir temperert før du sett dei inn i kald ovn og skrur på 250 grader. La dei steike på 250 grader i 10 minutter etter den har blitt varm, før du skrur ned til 200 grader og steiker vidare i 50 minutt.

Om du er ny innen surdeigsbaking og vil lære meir, meld deg på surdeigskurset mitt her. Der lærer du alt det grunnleggande du treng å vite for å komme i gong og lykkast med surdeigsbakst!