Surdeigspizza

Noko av det eg brukte lang tid for å få til var surdeigspizza. Men når eg endeleg knakk koden, då blei det mykje pizzabaking! No har vi digg surdeigspizza med sprø og luftig skorpe her i huset dei fleste laurdagar. 

Oppskrifta er veldig enkel, og det beste er at du kan lage den nokre dagar i forvegen og ha den på kjøl, så det er berre å bake ut, ha på digg fyll og steike i veg den dagen du skal ete den. 

Eg brukar å lage dobbelt eller trippel porsjon, og fryse ned slik at eg alltid har pizza i frysaren. Perfekt for travle laurdagar vi har lyst på pizza, men ikkje orkar å lage det. 

Surdeigspizza (to store eller fire små):

400 gram vatn
100 gram surdeigsstartar
500 gram sikta mjøl - eg føretrekk å bruke 50/50 med sikta kveite frå Holli Mølle og pizzamjøl Tipo 00
15-20 gram salt

Bland vatn, surdeigsstartar og mjøl. La det stå i 30 minutt før du klemmer salt inn i deigen. Strekk og brett deigen kvar halvtime i 3-4 timar. Du kan så gjær det på to måtar; enten kan du dele opp deigen i passande leiver til pizza, forme dei runde og ha dei i boksar med god plass til å heve i før du sett dei kaldt - eller så sett du heile deigen kaldt og lar den stå der til du skal lage pizza - då deler du leivene opp då før du lagar pizza. Eg synest begge delar fungerar bra og pizzaen blir uansett veldig god med sprø og luftig skorpe!

Mine beste pizzatriks;
- Ikkje bruk kjevle, berre strekk deigen med begge hendene
- Bruk semulegryn i staden for mjøl når du skal bake ut
- Steik på bakestål for å få ekstra sprø botn - bruk gjerne bakepapirark så ikkje pizzaen sett seg fast
- Bruk høg varme! Legg bakestålet inn i omnen, skru den på 250 grader over og undervarme og la omnen bli skikkelig varm før du startar med steikinga
- Ikkje ha på for mykje pizzasaus, då kan det bli vanskeleg å få botnen sprø
- Ha på ost før topping, og gjerne miks ulike typar ostar